धादिङको ज्वालामुखी गाउँपालिकामा ‘म्याक्स हेल्दी भिलेज’ कार्यक्रम अन्तर्गत ‘म्याक्स स्वस्थ पालिका कार्यक्रम’ औपचारिक रूपमा शुभारम्भ गरिएको छ ।यो कार्यक्रम म्याक्स फाउन्डेसन र फोकस नेपालको सहकार्यमा औपचारिक रुपमा शुभारम्भ गरिएको हो ।
कार्यक्रममा बोल्दै प्रमुख अतिथि संविधानसभा सदस्य गुरूप्रसाद बुर्लाकोटीले ग्रामीण भेगको स्वास्थ्य प्रणाली सबल बनाउन स्थानीय सरकारको सक्रियता अत्यन्त जरुरी हुने बताउनुभयो । उहाँले स्वास्थ्य सेवा, स्वच्छता र समुदायमा जागरणलाई दीर्घकालीन विकासका आधार स्तम्भका रूपमा लिनुपर्नेमा जोड दिनुभयो।
गाउँपालिकाका उपाध्यक्ष धर्म बहादुर अर्यालले भौतिक पूर्वाधार मात्रै विकासको मानक नभएको उल्लेख गर्दै शिक्षा, स्वास्थ्य, सरसफाइ तथा सामाजिक चेतनाको समग्र प्रगतिलाई नै वास्तविक विकास मानिने बताउनुभयो। उहाँले स्वस्थ समाज निर्माणका लागि व्यवहार परिवर्तन अनिवार्य रहेको र पालिकाले यसमा नीतिगत रूपमा काम गरिरहेको जानकारी दिनुभयो।
कार्यक्रममा गाउँपालिकाका स्वास्थ्य शाखा प्रमुख सुजन श्रेष्ठले गाउँपालिकाभित्रका स्वास्थ्य संस्थाहरूको अवस्था र सेवाबारे प्रस्तुतिकरण गर्नुभयो। उहाँले विद्यालय क्षेत्रभित्र ‘३ च’—चाउचाउ, चकलेट र चिउइङगम—निषेध गरिएको जानकारी दिँदै बालबालिकाको पोषण तथा स्वास्थ्य व्यवहार सुधारलाई पालिकाले प्राथमिकतामा राखेको बताउनुभयो ।
त्यस्तै गाउँपालिकाका अध्यक्ष यमनाथ दनैले केही बस्तीहरूलाई नमूना सफा तथा स्वस्थ गाउँ घोषणा गरिसकेको उल्लेख गर्दै “म्याक्स स्वस्थ पालिका कार्यक्रम लागू भएपछि गाउँपालिकाको स्वास्थ्य संरचना अझ सबल, व्यवस्थित र दिगो बन्नेमा विश्वास गरिएको” बताउनुभयो।
म्याक्स हेल्दी भिलेज परियोजनाअन्तर्गत स्वास्थ्य तथा सरसफाइ जागरण, विद्यालय पोषण कार्यक्रम, दन्त स्वास्थ्य अभ्यास, हातधुने प्रणाली, मातृ–शिशु स्वास्थ्य सुदृढीकरण, नियमित स्वास्थ्य स्क्रिनिङ तथा डेटा अभिलेखन, स्वच्छ खानेपानी र फोहोर व्यवस्थापनजस्ता क्रियाकलाप सञ्चालन गरिने जनाएको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |