क्रान्तिकारी कम्युनिस्ट पार्टी नेपालले आजदेखि देशव्यापी रुपमा ‘भ्रष्टाचार विरोधी अभियान’ सुरु गरेको छ । धादिङमा आयोजित विशेष पत्रकार सम्मेलन तथा उद्घाटन कार्यक्रममा पार्टीका जिल्ला इन्चार्ज अमृत अधिकारी र ८ नं व्युरो इन्चार्ज भीम चापागाईंले अभियानको औपचारिक घोषणा गर्दै भ्रष्टाचारका विरुद्ध प्रतिरोध र जनकारबाहीको चेतावनी समेत दिनुभएको छ । कार्यक्रममा बोल्दै जिल्ला इन्चार्ज अमृत अधिकारीले देशमा व्याप्त संस्थागत भ्रष्टाचारको अन्त्यका लागि पार्टीले संघर्षको बाटो रोज्नुपर्ने अवस्था आएको बताउनुभयो । मन्त्रालयदेखि स्थानीय तह, अदालतदेखि प्रहरी प्रशासनसम्म भ्रष्टाचार व्याप्त छ, जनताको काम गर्न घुस नदिँदासम्म सिफारिस समेत नपाइने अवस्था रहेको उहाँले बताउनुभयो ।
भ्रष्टाचारको जरा सरकारभित्रै रहेको आरोप लगाउँदै उहाँले सरकारमा सामेल दल मात्र होइन, प्रतिपक्षका नेताहरु समेत भ्रष्टाचारमा लिप्त रहेको बताउनुभयो । ललिता निवास, भुटानी शरणार्थी, सहकारी ठगीजस्ता काण्डहरूले यसको पुष्टि गरेको उहाँको भनाई छ ।त्यसैगरी, व्युरो इन्चार्ज भीम चापागाईंले अभियान केवल चेतना अभिवृद्धिमा सीमित नरहने स्पष्ट पार्नुभयो। “भ्रष्टाचारको विरुद्ध जनताले प्रतिरोध गर्ने बेला आएको छ। आवश्यकता परे जनकारबाहीमा समेत जान्छौं,” चापागाईंले चेतावनी दिनुभयो । पार्टीले भ्रष्टाचार विरोधी अभियानको मूल उद्देश्य देशमा व्याप्त संस्थागत भ्रष्टाचारको विरुद्ध आम जनतालाई संगठित गर्दै, वैज्ञानिक समाजवादतर्फ अग्रसर हुने लक्ष्य रहेको जनाएको छ ।
वर्तमान संसदीय व्यवस्था भ्रष्टाचारलाई पोषण गर्ने संरचना भएकोले यस व्यवस्थाको विकल्प खोज्नु आवश्यक भइसकेको उहाँले बताउनुभयो । क्रान्तिकारी कम्युनिस्ट पार्टी नेपालले यस अभियान अन्तर्गत विभिन्न जिल्ला, पालिका र वडास्तरमा जनप्रशिक्षण, भ्रष्टाचार उजुरी संकलन, जनसभा, प्रदर्शन लगायतका कार्यक्रम सञ्चालन गर्ने योजना बनाएको छ। पार्टीका नेताहरूले न्यायप्रेमी सम्पूर्ण जनसमुदायलाई भ्रष्टाचार विरोधी अभियानमा सहभागी हुन हार्दिक अपीलसमेत गरेका छन्।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |