धादिङमा रणनीतिक वन व्यवस्थापन कार्ययोजनाको मसौदा अनुमोदन

डिभिजन वन कार्यालय धादिङले आवधिक योजना सहितको रणनीतिक वन व्यवस्थापन कार्ययोजनाको मसौदा प्रस्तुतिकरण तथा अनुमोदन कार्यक्रम सम्पन्न गरेको छ। वनको दिगो व्यवस्थापन र स्थानीय सहभागितालाई सुनिश्चित गर्ने उद्देश्यसहित आयोजना गरिएको कार्यक्रममा विभिन्न सरोकारवालाहरूको उल्लेखनीय उपस्थिति रहेको थियो। कार्यक्रममा डिभिजन वन कार्यालय धादिङका प्रमुख विष्णु प्रसाद आचार्यले रणनीतिक वन व्यवस्थापन कार्ययोजनाले वन स्रोतको संरक्षण, उपयोग, दिगोपन र जैविक विविधताको प्रवद्र्धनमा महत्वपूर्ण योगदान पु¥याउने बताउनुभयो ।

सहभागितामूलक वन व्यवस्थापनले मात्र दीगो विकास सम्भव हुने बताउदै स्थानीय तहको सहकार्य, उपभोक्ता समितिको सक्रियता र वैज्ञानिक आधारमा तयार गरिएका योजनाहरू कार्यान्वयनमा ल्याइनेछ बताउनुभयो ।जिल्ला समन्वय समिति धादिङका प्रमुख नवराज अधिकारीले स्थानीय तह र समन्वय समितिको भूमिकालाई उल्लेख गर्दै रणनीतिक वन व्यवस्थापनमा सबै पक्षको सहकार्य आवश्यक रहेको धारणा राख्नुभयो । उहाँले भन्नुयो, “ वन क्षेत्रले जिल्लाको वातावरणीय सन्तुलन मात्रै होइन, आर्थिक समृद्धिमा पनि योगदान दिन सक्छ। यसको समुचित व्यवस्थापन हामी सबैको दायित्व हो।”नीलकण्ठ नगरपालिकाका उपमेयर दीपक विश्वकर्माले नगरपालिकाको तर्फबाट योजनाको कार्यान्वयनमा आवश्यक सहयोग गर्ने प्रतिबद्धता जनाउनुभयो ।

नगरपालिकाको नीति, योजना र बजेट वन स्रोतको संरक्षणमा केन्द्रित हुने उहाँको भनाई छ ।कार्यक्रममा वन उपभोक्ता समितिका प्रतिनिधिहरूले पनि आ–आफ्नो धारणा राखेका थिए। उनीहरूले रणनीतिक कार्ययोजना स्थानीय आवश्यकतासँग मिल्दोजुल्दो र व्यवहारिक बनाउन सुझाव दिएका थिए । यस मसौदामा वन क्षेत्रको वैज्ञानिक वर्गीकरण, प्रजातिको संरक्षण, हरित आवरण वृद्धि, जैविक विविधताको प्रवद्र्धन, वातावरणीय शिक्षा तथा पारिस्थितिकीय सेवामा आधारित रणनीतिहरू समेटिएका छन्। कार्ययोजना वन कार्यालय, स्थानीय तह, उपभोक्ता समूह तथा अन्य सरोकारवाला निकायहरूबीच समन्वयमा लागू गरिने बताइएको छ। कार्यक्रममा सरकारी कर्मचारी, जनप्रतिनिधि, पत्रकार, सामुदायिक वन उपभोक्ता समूहका प्रतिनिधि तथा सरोकारवालाहरूको उत्साहजनक सहभागिता रहेको थियो।