धादिङमा जातीय छुवाछुत र सामाजिक विभेद उन्मूलन दिवसको अवसरमा अन्तरक्रिया

१९ औं जातिय छुवाछुत र सामाजिक विभेद उन्मुलन दिवस धादिङमा पनि अन्तरक्रिया गरि मनाईएको छ । अन्तरक्रिया कार्यक्रममा नीलकण्ठ नगरपालिकाका उपप्रमुख दिपक विश्वकर्माले नियम कानुनलाई प्रयोग गरेर समुदायमा परेको अन्यायको बारेमा आवाज उठाउन आग्रह गर्नुभयो । यसको निम्ति शिक्षालाई प्रमुख हतियार बनाएर लैजानुपर्नेमा जोड दिनुभयो । जातिय भेदभावका कुराहरुलाई मात्रै लिएर नहुने बताउदै नगरपालिकाले शिक्षालाई पहिलो प्राथमिकता दिई आर्थिक उपार्जनको निम्ति विभिन्न कार्यक्रमहरु संचालन गरिरहेको बताउनुभयो ।

कार्यक्रममा जिल्ला न्यायधिस मन कुमारी विश्वकर्माले जातिय छुवाछुत विरुद्धको ऐन २०६८ आएपछि दलित समुदायले आवाज उठाउन सकेको बताउनुभयो । ऐन नहुँदा दलित समुदायका नागरिकहरुले मानवको रुपमा बाच्न पाउने अधिकार बाट वञ्चित हुन परेको स्मरण गर्दै कसैले जातिय विभेद गरेमा उजुरी लिएर न्यायको लागि न्यायलयमा आउन आग्रह गर्नुभयो । यस्तै प्रमुख जिल्ला अधिकारी समुन घिमिरेले अन्याय सहनु ठुलो अपराध रहेको बताउदै अन्याय सहेर बस्न नहुने बताउनुभयो । यदि कतै विभेद गरेको उजुरी आएमा विभेद गर्नेलाई तुरुन्त नियन्त्रणमा दिने बताउनुभयो ।

यसैगरी नेपाल पत्रकार महासंघ धादिङका अध्यक्ष सिताराम अधिकारीले जातिय छुवाछुत अन्त्यको निम्ति निरन्तर कलम चलाईरहेको बताउदै दलित समुदायको पक्षमा समाचार लेख्दा विभिन्न आलोचनाहरु खेप्नुपरेको स्मरण गर्नुभयो । यस्तै नीलकण्ठ नगरपालिका वडा नम्बर ९ का वडा अध्यक्ष राजन बराईलीले आफु जनप्रतिनिधी हुँदा पनि विभेद भोग्न बाध्य रहेको बताउनुभयो । ‘म वडा अध्यक्ष हो, शिक्षित व्यक्तिहरुले मलाई सहज रुपमा उहाँहरुको घरभित्र सँगै खाना खुवाउन सक्नुहुन्न,‘उहाँ भन्नुभयो ठोकुवा गरेर भन्छु मेरो वडामा अझै पनि जातिय विभेद कायमै छ ।’

कार्यक्रममा दलित अधिकारकर्मी भुवल विश्वकर्मा, कुमार विश्वकर्मा, रामबहादुर बसेलले जुनसुकै राजनिति धर्म भएपनि यसलाई पन्छाएर जातिय विभेद अन्त्यको निम्ति एक ढिक्का भएर लाग्नुपर्ने जोड दिनुभएको छ ।

भोजभत्तेर वा सामाजिक कार्यमा जाँदा विभेद हुने गरेको साथै दलित समुदायलाई भन्दा पनि गैरदलित समुदायलाई जातिय छुवाछुत सम्बन्धी सचेतना कार्यक्रमहरु दिन आवश्यक रहेको सभागिहरुले बताएका छन् ।