नीलकण्ठ नगरपालिकाको दोस्रो नगर सभाको छैटौं हिउँदे अधिवेशन सम्पन्न,बजेट तथा कार्यक्रम संशोधन

धादिङको नीलकण्ठ नगरपालिकाको दोस्रो नगर सभाको छैटौँ हिउँदे अधिवेशन सम्पन्न भएको छ । बुधबार चालु आर्थिक वर्ष २०८०÷०८१ को बजेट तथा कार्यक्रम संशोधन सहित नीलकण्ठ नगरपालिकाको कृषि विधेयक,२०८१,नगर प्रहरी व्यवस्थापन विधेयक,२०८१ पारित गर्दै सम्पन्न भएको हो । सभामा प्रस्तुत नीति तथा कार्यक्रमको कार्यान्वयन अवस्थाको समिक्षा प्रतिवेदन समेत प्रस्तुत गरीएको थियो ।

नगर प्रमुख भीम प्रसाद ढुंगानाले नीलकण्ठ नगरपालिकाले नगरबासीको भावनालाई सम्बोधन गरेर काम गरीरहेको बताउनुभयो । नीलकण्ठ नगरपालिकाले १२ कक्षाको सम्मको शिक्षा निशुल्क गरेर स्थानीय सरकारको आभास गराउने काम गरेको बताउनुभयो । शैक्षिक गुणस्तर बृद्धिको लागि नगरपालिकाले शिक्षामा धेरै काम गरीरहेको बताउनुभयो ।

साथै वडा कार्यालय सम्म पिच गर्ने नीति अनुसार काम भईरहेको भन्दै उहाँले एकाध वडा बाहेरअन्य वडा सम्म कालोपत्रे सम्पन्न भईसकेको बताउनुभयो । स्वास्थ्य, खानेपानी, खेलकुद, कृषि,पर्यटन लगायतको क्षेत्रमा नगरपालिकाले काम गरीरहेका भन्दै उहाँले उत्साह र आशा जनगाउने गरी काम गरीरहेको बताउनुभयो ।

नगरपालिकाले फोहोर ब्यवस्थापन शुल्कमा २० प्रतिशत छुट र ३ बर्ष भन्दा बढि नविकरण नभएको ब्यवसायमा १०० प्रतिशत जरिवाना छुट पनि दिएको उहांले बताउनुभयो । नगरपालिकाको बजेटले मात्रै विकास गर्न नसकिने भन्दै उहाँले दातृ निकायसँगको सहकार्यमा काम गरीरहेको समेत बताउनुभयो ।

यसैगरी नगर उप प्रमुख दिपक विश्वकर्माले आर्थिक बर्ष ०८०÷८१र चालू आर्थिक बर्षको कार्तिक मसान्तसम्मको बजेट कार्यान्वयन प्रतिवेदन तथा विनियोजन ऐन, २०८१ र आर्थिक ऐन, २०८१ मा संशोधन प्रस्ताव पेश गर्नुभएको थियो ।

चालू आ.व. २०८१÷०८२ को कुल विनियोजित बजेट रु. १ अर्ब २२ करोड २३ लाख ९२ हजार ४०० भएकोमा मिति २०८१ मंसिर ११ गते सम्मको खर्च रु. २० करोड ,६२ लाख ५२ हजार ४ सय २५ रहेको छ । जुन विनियोजनको आधारमा १६.८७ प्रतिशत खर्च भएको प्रगती प्रतिवेदन प्रस्तुत गर्नुभएको थियो ।

आज नगरसभामा प्रस्तुत भएको बजेट तथा कार्यक्रम संशोधनसहितका प्रस्तावहरु माथिको छलफल पछि सर्वसमत पारित भएको छ ।उठेका सवालहरु माथि नीलकण्ठ नगरपालिकाका नगर भीम प्रसाद ढुंगानाल प्रष्ट पार्नुभएको थियो ।