काठमाडौं, १२ चैत । काठमाडौं उपत्यका विकास प्राधिकरणले काठमाडौंको तारकेश्वर नगरपालिका वडा नं।११ स्थित महादेव खोला करिडोरमा डोजर चलाएको छ । प्राधिकरणका बोर्ड सचिव एवं कानून अधिकृत घनश्याम पौडेलको अगुवाइमा महादेव खोलास्थित करिडोरमा डोजर चलाइएको हो । बोर्ड सचिव एवं कानून अधिकृत पौडेलका अनुसार सो क्षेत्रमा सुकुम्बासीको नाममा १२ रोपनी भन्दा धेरै सार्वजनिक जग्गा हडपेर भाडामा लगाइएको थियो ।
तारकेश्वर नगरपालिका प्रमुख कृष्णहरि महर्जनको संरक्षणमा उक्त सार्वजनिक जग्गा शक्ति र पहुँच भएकाहरुले हडपेर भाडामा लगाएको स्थानीयहरु बताउँछन् । प्राधिकरणका बोर्ड सचिव एवं कानुन अधिकृत पौडेलले सार्वजनिक जग्गा संरक्षणको अभियानमा आफूहरु रहेको बताउदै ठूला बडा भनिएकाहरुले काठमाडौं उपत्यकाभित्र लाखौं रोपनी सार्वजनिक जग्गा अतिक्रमण गरेर ओगटेको दाबी गरे ।
उनले भने, “सार्वजनिक जग्गा संरक्षण गर्ने दायित्व प्राधिकरणको हो । काठमाडौं उपत्यकाको विभिन्न ठाउँमा गरेर लाखौं रोपनी सार्वजनिक जग्गा अतिक्रमण भएको छ । सार्वजनिक जग्गा अतिक्रमण हुनुमा संरक्षण गर्ने अख्तियारी पाएहरुकै हात छ । हामी निरन्तर यस्तो अतिक्रमित जग्गा राज्यको नाममा फिर्ता गराउने अभियानमा छौं ।”
प्राधिकरणले यसअघि पनि सार्वजनिक जग्गा अतिक्रमण भएका विभिन्न ठाउँमा डोजर चलाउँदै आएको छ । प्राधिकरणले सहरी विकास मन्त्रालयका सचिव गोपाल सिग्देलका ससुराको लगानी भएको चावहिलस्थित ओम हस्पिटल, नेपाली कांग्रेसका केन्द्रीय सदस्य समेत रहेका विजय तुम्बाहाम्फेको लोयल्टी स्कुललगायतका ठाउँमा यसअघि डोजर चलाइसकेको छ । राजनीतिक रुपमा ठूलै पावर र पहुँच भएका व्यक्तिहरुले सार्वजनिक जग्गा हडप्ने गरेको प्राधिकरणका बार्ड सचिव एवं कानून अधिकृत पौडेल बताउँछन् । पौडेलले पूर्व प्रधानमन्त्री, पूर्व परराष्ट्र मन्त्री, नेपाल प्रहरीका पूर्व आईजीपी र पूर्व प्रधानन्याधीशसमेतले सार्वजनिक जग्गा अतिक्रमण गरेको संकेत गर्दै यसबारेमा केही समयपछि नाम सार्वजनिक गरिने बताए ।
त्यस्तै, प्राधिकरणले केही समय अगाडि टोखाको दाहालगौडास्थित १० रोपनी अतिक्रमित सार्वजनिक जग्गामा डोजर चलाएको थियो । उक्त क्षेत्रमा टोखा नगरपालिका वडा नं. ४ का वडा अध्यक्ष नरोत्तम लामाले आफ्नी श्रीमतीमार्फत सुकुम्बासीहरुबाट भाडा उठाउँदै आएको पाइएको पनि प्राधिकरण स्रोतले बताएको छ ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |