बालेन र रविबाट कति–कति मन्त्री ?

रास्वपा एउटै पार्टी भए पनि त्यहाँ दुई पक्ष छ– एउटा बालेनको, अर्को रविको । बालेन औपचारिक रूपमा पुस १३ गते मात्र रास्वपामा प्रवेश गरेका हुन् ।

प्रधानमन्त्री पाउने शर्तमा देश विकास पार्टी नखोली घण्टीमा मिस्सिएका बालेनको अनुहार हेरेर धेरैले भोट दिएको प्रष्ट छ । बालेनकै आकर्षणका कारण फागुन २१ गते सम्पन्न प्रतिनिधिसभा सदस्य निर्वाचनमा रास्वपा दुईतिहाई नजिक पुगेको पनि अब घामजत्तिकै छर्ल¨ भइसक्यो । रास्वपाले सचिवालयको चैत १ गते आइतबारको भर्चुअल बैठकबाट बालेनलाई प्रधानमन्त्री बनाउने विषयमा सहमति गरेको छ । हाल मन्त्री छनोटको विषयमा छलफल चलिरहेको छ ।

बालेनले निकटस्थहरूलाई मन्त्रिमण्डल गठनमा रविले हस्तक्षेप नगरिदिउन् भनिरहेका छन् तर त्यो सम्भव देखिँदैन । किनकि रवि अब बन्ने क्याबिनेटमा आफूनिकट बढीभन्दा बढी नेतालाई मन्त्री बनाउन चाहन्छन् । हाल बालेन सरकारमा मन्त्री बन्ने केहीको नाम चर्चामा आएको छ । ती रवि पक्षका नेता हुन् । जसमा डा.स्वर्णिम वाग्ले–अर्थ, उपसभापति डोलप्रसाद (डिपी) अर्याल– गृहलगायत छन् । गृहमन्त्रीमा डिपी र अर्थमन्त्रीमा स्वर्णिमको नाम छ । तर, स्रोतका अनुसार बालेन गृह नभए भौतिक योजना वा शहरी विकासमा आफ्नो दाहिने हात सुनिल लम्साललाई ल्याउन चाहन्छन् । काठमाडौं महानगरपालिकामा सुनिल बालेनको सल्लाहकार थिए ।

इञ्जिनियरिङ ब्याकग्राउण्डका उनलाई बालेनले नै महानगरमा ल्याएका हुन् । बालेनको कोर टिममा रहेका सुनीलले रूपन्देही क्षेत्र नम्बर १ बाट चुनाव जितेका छन् । यता, बालेन रामेछापबाट निर्वाचित डा.कृष्णहरि बुढाथोकीलाई अर्थमन्त्री बनाउन चाहिरहेको बुझिन्छ । कृष्णहरिले पनि स्वर्णिमले झैं अर्थशास्त्रमा विद्यावारिधि र विभिन्न विषयमा स्नातकोत्तर सकाएका छन् । उनीसँग दुई दशक बैंक तथा वित्तीय क्षेत्रमा काम गरेको अनुभव छ । २०८० को उपनिर्वाचनमा पनि तनहुँबाट सांसद निर्वाचित स्वर्णिम त्यतिबेलैदेखि अर्थ ताकेर बसिरहेका छन् ।

रविले चुनावी सभामा बोल्दै उनलाई ०८३/०८४ को बजेट लेख्न थाल्न भनेका थिए । अर्कोतिर, बालेनले कैलालीबाट जितेका केपी खनाललाई पनि मन्त्री बनाउन चाहेका छन् । बालेननिकट उनी ‘चिया अड्डा’ सञ्चालन गरेर बसेका थिए ।

सहज रूपमा क्याबिनेट चलाउन बालेनले निकट पात्रहरूलाई मन्त्री बनाउन चाहेको जिकिरसहित स्रोतले भन्यो, ‘बालेन रविले सभापतिको जिम्मेवारी चलाउन् भन्नेमा छन् । मन्त्री छान्ने काममा आफूलाई अवरोध नगरुन् भन्ने धारणा छ । उनले आफ्नो तर्फबाट मन्त्री छानिसकेका छन् तर रविले त्यसमा सर्लक्कै सहमति जनाउने देखिँदैन । मन्त्री छनौटमा रास्वपामा राम्रै तानातान हुने देखिएको छ ।’