गुणस्तरिय शिक्षासहित शत प्रतिशत नतिजामा नीलकण्ठ नगरपालिकाको जोड

गुणस्तरिय शिक्षासहित शत प्रतिशत नतिजा ल्याउन नगरपालिकाले जोड दिदै आएको नीलकण्ठ नगरपालिकाका नगर प्रमुख भिम प्रसाद ढुंगानाले बताउनुभएको छ । नगरपालिकाको कुल बजेटमध्ये ४० प्रतिशतभन्दा बढी शिक्षा क्षेत्रमा लगानी भएको भन्दै अब उत्कृष्ट नतिजामा जोड दिएको बताउनुभयो ।

नीलकण्ठ नगरपालिका भित्रका प्रधानाध्यापकहरुको लागि आयोजित दुई दिने प्रगति समिक्षा, क्षमता विकास तालिमलाई सम्बोधन गर्दै उहाँले यस्तो बताउनुभएको हो । त्यस्तै, एसइई परिक्षामा शत प्रतिशत नतिजा ल्याउने विद्यालयका प्रधानाध्यापक, विद्यालय व्यवस्थापन समितिका अध्यक्षलाई बाजागाजा सहित नगर परिक्रमा गराईने बताउनुभयो । ‘उत्कृष्ट नतिजा ल्याउने विद्यालयका शिक्षक, व्यवस्थापन समिति तथा विद्यार्थीलाई प्रोत्साहन स्वरूप सम्मान गरिने गरिनेछ ।

चार जिपिए ल्याउने विद्यार्थी र प्रधानाध्यापकलाई सँगै नगर परिक्रमा गराउँछौं’ उहाँले भन्नुभयो– ‘लगानी अनुसार नतिजा ल्याउने गरी विद्यालयले गुणस्तरिय शिक्षामा जोडा दिनु पर्छ । कक्षा १२ सम्मको शिक्षा निःशुल्क गरिएको छ । अभिभावक तथा विद्यार्थीलाई आर्थिक भार कम भएको छ । अब हाम्रो जोड गुणस्तरिय शिक्षामा हो ।’यस वर्ष पनि नीलकण्ठ नगरपालिकाले शत प्रतिशत नतिजा ल्याउने विद्यालयलाई चार लाख र चार जिपिए ल्याउने विद्यार्थीलाई नगद ५० हजार रुपँयाले सम्मान गरेको थियो ।