सामुदायिक तथा कबुलियती वन उपभोक्ता समूहहरूलाई नगद सहित सम्मान

डिभिजन वन कार्यालय धादिङको वार्षिक कार्यक्रम राष्ट्रिय वन संरक्षण तथा व्यवस्थापन कार्यक्रम अन्तर्गत डिभिजन स्तरीय समन्वय बैठक सम्पन्न भएको छ । बुधबार जिल्ला वन क्षेत्र समन्वय समिति र सरोकारवालाको सहभागितामा डिभिजन स्तरीय समन्वय बैठक सम्पन्न भएको हो ।

कार्यक्रममा राष्ट्रिय वन संरक्षण तथा व्यवस्थापन कार्यक्रम अन्तर्गत सामुदायिक तथा कबुलियती वन उपभोक्ता समूहहरूलाई नगदसहित पुरस्कृत तथा सम्मान गरिएको छ ।कबुलियती वन समूहतर्फ बेनिघाट रोराङ वडा नं १० को संसारी डाँडा प्रथम, बेनिघाट रोराङ वडा नं १ को परिवर्तनशील कबुलियती वन उपभोक्ता समूह द्वितीय, र सिद्धलेक वडा नं ६ को समिटार कबुलियती वन उपभोक्ता समूह तृतीय भएका छन्।

यस्तै, सामुदायिक वनतर्फ त्रिपुरासुन्दरी वडा नं ५ को श्री सल्यान कठेरी सामुदायिक वन उपभोक्ता समूह प्रथम, बेनिघाट रोराङ वडा नं ५ को विशाल संयुक्त सामुदायिक वन उपभोक्ता समूह द्वितीय, र गजुरी वडा नं ५ को ठूलो वन सामुदायिक वन उपभोक्ता समूह तृतीय भएका छन्।