नीलकण्ठ–८ मा च्याउ खेती प्रवद्र्धन र ५६ दिने निःशुल्क मेसन तालिम सम्पन्न

नीलकण्ठ नगरपालिका वडा नम्बर ८ मा कृषक सदस्यहरुको लागि व्यवसायिक च्याउ खेती प्रवद्र्धन सम्बन्धी तालिम सम्पन्न भएको छ । आरोहण शिक्षालयमा आईतबार देखि संचालन भएको तालिम आज सकिएको हो । तालिम समापन कार्यक्रमलाई सम्बोधन गर्नुहुँदै वडा अध्यक्ष प्रकाश कुमार श्रेष्ठले च्याउ खेतीले आर्थिक उपार्जनको निम्ति महत्वपूर्ण भुमिका खेल्ने बताउदै यसलाई निरन्तरता दिन आग्रह गर्नुभयो ।
बजार क्षेत्रमा बाहिरबाट च्याउ आयत भईरहेको अवस्थामा आफ्नै ठाउँमा च्याउ उत्पादन गर्न सके बजार प्रशस्त रहेको बताउनुभयो । आम नागरिकहरुको आवश्यकतालाई मध्यनजर गर्दै वडाले आर्थिक उपार्जनको निम्ति विभिन्न तालिमहरु संचालन गरेको बताउदै यसलाई सदुपयोग गर्न सहभागिहरुलाई आग्रह गर्नुभयो ।

कार्यक्रममा सहभागिहरुले च्याउ खेती तालिम निकै उपलब्धिमुलक रहेको बताउदै यसलाई निरन्तरता दिने प्रतिवद्धता व्यक्त गरेका छन् । अनन्त आशा नेपाल चितवन(टेको परियोजना) को आयोजना,वडा नम्बर ८ को समन्वय, अनन्त आशा ईन्टरनेशनलको सहयोग र रामकोट बचत तथा ऋण सहकारीको समन्वयमा तालिम संचालन भएको हो । अन्नत आशा नेपालको संस्थापक उषा महर्जनको अध्यक्षतामा तालिम सम्पन्न भएको हो ।
यसैगरी आजै ५६ दिने निःशुल्क मेसन तालिम पनि सम्पन्न भएको छ । नेपाल सरकार श्रम, रोजगार तथा सामाजिक सुरक्षा मन्त्रालय अन्तर्गतको राष्ट्रिय व्यवसायिक प्रशिक्षण प्रतिष्ठान विकास समिति र राष्ट्रिय व्यवसायिक प्रशिक्षण प्रतिष्ठान, भैसेपाटी, ललितपुरको आर्थिक सहयोगमा सञ्चालित ५६ दिने निःशुल्क मेसन तालिममा २० जना सहभागीहरूले निर्माण कार्य सम्बन्धी सीप हासिल गरेका छन्न् ।

तालिम कान्तिपुर सुदूरपश्चिम टेक्निकल कलेज, धनगढी, कैलाली द्वारा प्रदान गरिएको हो । कार्यक्रमका वक्ताहरूले यस प्रकारका सीपमूलक तालिमले स्थानीय युवाहरूलाई आत्मनिर्भर बनाउँदै रोजगारीको अवसर सिर्जना गर्ने विश्वास व्यक्त गरेका छन् ।