ज्वालामुखी गाउँपालिका वडा नं ३ मैदीमा रहेको समिभन्ज्याङ माविमा बाल क्लबका पदाधिकारी निर्वाचनमा १५५ जना विद्यार्थीहरूले मतदान गरेका छन् ।कक्षा ४ देखि १० सम्मका विद्यार्थीहरूबाट १४४ मत खसेको थियो र त्यसमा तीन मत बदर भएको छ । अध्यक्षको उम्मेदवार कक्षा १० कि अन्जना बराहीले ज्यामिती बकस चिह्न लिएर ९७ मत प्राप्त गर्दै विजयी हुनुभएको छ ।उहाँको निकटतम प्रतिद्वन्दी अनुसा तामाङ कुर्ची चिह्नमा ४४ मत परेको थियो।
त्यस्तै उपाध्यक्षमा प्रमोद तामाङको मार्कर चिह्नले ८८ मत प्राप्त गर्दै विजयी हुदा कृशाला सेडाइले ५३ मत प्राप्त गर्नुभयो । सचिव पदको निर्वाचनमा घडी चिन्ह लिएर उठेका विक्रम खुलालले ४८ मत ल्याएर विजयी हुनुभयो भने निकटतम प्रतिद्वन्दी आशिका तामाङले ४२ मत मात्र ल्याउनुभयो ।
त्यसैगरी कोषाध्यक्ष पदको लागि भएको निर्वाचनमा ८० मत ल्याउँदै मोटरसाइकल चिन्ह लिएका पूजन बि.क विजयी हुनुभयो भने निकटतम प्रतिद्वन्दी सन्ध्या थापाले ६१ मत ल्याउनुभयो ।
मतदान कार्यक्रमलाई सफल बनाउन माध्यमिक विद्यालयका सम्पूर्ण शिक्षकहरूले विभिन्न जिम्मेवारीमा रहेर भुमिका निर्वाह गर्दै निर्वाचन कार्यक्रमलाई सफल प्रभावकारी बनाउनुभएको थियो । भने विद्यार्थीहरू स्वयंसेवकको रुपमा परिचालित भएका थिए ।
निर्वाचन कार्यक्रममा कार्यतालिका अनुसार मतदाता नामावली प्रकाशनदेखि मतदान प्रक्रियासम्म आइपुग्दा विद्यार्थीहरुमा व्यावहारिक सिकाइसँगै नेतृत्व विकास र अनुशासित रहन समेत सिकाउने विश्वाश गरिएको निर्वाचन अधिकृत एवं शिक्षक नवराज सापकोटाले बताउनुभयो । निर्वाचनमा विजयी हुने सबै उम्मेदवारहरूलाई मंगलबार प्रार्थना समयमा निर्वाचन समितिको तर्फबाट प्रमाणपत्र प्रदान गर्ने र शपथ ग्रहण गराउने उहाँले बताउनुभयो ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |