नीलकण्ठ नगरपालिकाले विभिन्न कार्यक्रम गरि स्थापना दिवस मनायो

धादिङको नीलकण्ठ नगरपापलिकाले विभिन्न कार्यक्रम गरि १२औं स्थापना दिवस भव्य रुपमा मनाएको छ । नेपाल सरकारको मन्त्रिपरिषद्को २०७१ साल वैशाख २५ गतेको निर्णयबाट नीलकण्ठ नगरपालिका गठन भएको हो । उक्त गठन भएको दिन बैशाख २५ गतेलाई नगरपालिकाले स्थापना दिवसको रुपमा मनाउदै आएको छ । यो वर्ष पनि नगरपालिकाले विविध कार्यक्रम गरि स्थापना दिवस मनाएको हो ।
नीलकण्ठ नगरपालिकाले स्थापना दिवसको अवसरमा आयोजना गरेको कार्यक्रमको सम्बोधन गर्दै नेपाल सरकारका वन तथा वातावरण मन्त्री ऐन बहादुर शाहीले प्रयोगविहिन भएर खेर गइरहेको स्वदेशी काठ प्रयोग गरि विदेशी काठको प्रतिस्थापन गर्ने नीति तथा कार्यक्रममा सुधार गरेको बताउनुभयो । ‘दिगो वन व्यवस्थापन रणनिति लागु गरेर स्वदेशी काठ उत्पादन तथा प्रयोग गरि रोजगारीसँग जोड्ने तयारी गरेका छौं । वन क्षेत्र देशको मूख्य आम्दानीको श्रोत बन्ने गरि कार्यक्रम लागू गर्दैछौं । वनलाई रोजगारी तथा समृद्धिसँग जोड्दै वन संरक्षणसँगै आम्दानी गर्ने कार्यक्रम बनाएका छौं’ उहाँले भन्नुभयो ।

‘व्यवस्था माथि निराशा छरेर भ्रम उत्पादन गर्ने काम भएको छ । हामी सबै एकजुट भएर संविधानको र संघीय लोकतान्त्रिक गणतन्त्रको रक्षाका लागि आ आफ्नो तर्फबाट योगदान गर्नु पर्छ । स्थानीय तहदेखि केन्द्रीय तहसम्म सबै सचेत भएर लाग्नु पर्छ’ उहाँले भन्नुभयो ।
त्यस्तै, नगरबासीले चाहे जस्तै नगरपालिकामा विकास भएको नगर प्रमुख भीमप्रसाद ढुंगानाले बताउनुभयो । ‘विकास निर्माण, शिक्षा, स्वास्थ्य, खानेपानी लगायत क्षेत्रमा नगरपालिकाले काम गरिरहेको छ । आम नागरिकको जनजीवन फेरिने गरि काम भएको छ । कक्षा १२ सम्म निःशुल्क शिक्षा प्रदान गरेका छौं । यो एउटा उदाहरण मात्रै हो । नगरपालिकाले उल्लेखनिय काम गरेको छ’ उहाँले भन्नुभयो।

नगर उपप्रमुख दिपक विश्वकर्माले नगरपालिकामा अझै धेरै कामहरु गर्न बाँकी रहेको बताउनुभयो । नगरपालिकामा सबै क्षेत्रमा विकासका कामहरु सुरु भएका छन् । उहाँले भन्नुभयो– ‘विकास निर्माण, सडक सञ्जाल, शिक्षा, स्वास्थ्य, खानेपानी जस्ता क्षेत्रमा धेरै परिवर्तन भएका छन् । तर यो परिवर्तनसँगै आम नागरिकका चाहना र आवश्यकताहरु पनि बढेका छन् । ति आवश्यकता तथा चाहना परिपूर्तिका लागि योजना तथा बजेट विनियोजन गर्दै समृद्ध नगरपालिका निर्माणका लागि नगरपालिकाले काम गरिरहेको छ ।’
नीलकण्ठ नगरपालिकाले स्थापना दिवसकै अवसरमा विभिन्न मैत्रीपूर्ण खेलकुद प्रतियोगिता समेत आयोजना गरिएको थियो । प्रतियोगितामा सहभागी खेलाडीहरुलाई प्रमाणपत्र, मेडल तथा ट्रफी प्रदान गरिएको छ ।