मैदीको चक्रदेवीमा मगर पुरोहित र सालैजु कौह्रा नृत्य तालिम हुने

ज्वालामुखी गाउँपालिका वडा नम्बर–३ मैदीमा मगर पुरोहित(वापा मापा) र सालैजु कौह्रा नृत्य तालिम संचालन हुनेभएको छ । नेपाल मगरसंघ ज्वालामुखी गाउँपालिका ईकाइको आयोजना ,नेपाल मगरसंघ जिल्ला समन्वय समिति धादिङ, नेपाल मगर बौद्ध सेवा समाज र ज्वालामुखी गाउँपालिकाको प्राविधिक सहयोगमा पौष २२ गतेदेखि उक्त तालिम संचालन हुन लागेको हो ।

मैदी उखुबारीमा रहेको चक्रदेवी टोलमा हुने ७ दिने तालिमको लागि फाराम खुलिसकेको नेपाल मगर संघ ज्वालामुखी गाउँपालिका ईकाइ अध्यक्ष कुल बहादुर झ्यारी मगरले जानकारी दिनुभयो ।मगर समुदायको भाषा, कला, संस्कृति र परम्परालाई जगेर्ना गर्ने उद्धेश्यले मगर पुरोहित(वापा मापा) र सालैजु कौह्रा नृत्य तालिम आयोजना गर्न लागिएको उहाँले बताउनुभयो । तालिमले नयाँ पुस्ताहरुलाई आफ्नो रितिरिवाज र परम्पराको बारेमा थप जानकारी गराउने अपेक्षा लिएको उहाँको भनाई छ ।
तालिमको लागि २१ जना मगर पुरोहित र २४ जना सालैजु कौह्रा नृत्यको लागि कोटा निर्धारण गरीएको छ । २९ गते तालिम समापनको दिन माघे संक्रान्तिको अवसरमा साँस्कृतिक कार्यक्रम गर्नुका साथै मगर जातिको संस्कृति झल्कने खानाका परिकारहरुको स्टल राखिने संघका अध्यक्ष कुल बहादुर झ्यारी मगरले बताउनुभयो ।