धादिङका तीन बालिका तिन दिनदेखी सम्पर्क विहीन

सदरमुकाम धादिङबेशीमा रहेको निलकण्ठ माध्यमिक विद्यालयमा अध्ययनरत तीन जना बालिका तिन दिनदेखी सम्पर्कविहीन भएका छन् ।कक्षा ९ मा अध्ययनरत १४ वर्षीय रोशनी विक, सुशिला तामाङ र अस्मिता गुरुङ बुधबार बिहान १० बजे विद्यालय आएका र त्यसपछि घर नफर्किएको अभिभावकहरूले बताएका छन् ।

२३ गते बिहान बिद्यालय पोषाकमा घरबाट हिंडेका यी छात्राहरू बिद्यालय नआइ धादिङबेशी बीचबजारमा सपिङ र ब्युटिपार्लर गएर मेकअप गरी नयाँ गेटअपमा हिंडेको बजारको सिसिटिभि फुटेजमा देखिएको नीलकण्ठ बालमन्दीर माविका वि.व्य.स.का अध्यक्ष दिपक कोईरालाले बाममती कलमलाई जानकारी दिनुभयो ।उनीहरूले नजिकका साथीहरूलाइ दिल्ली भाग्न लागेको बताएकाले कसैले फकाइ,दुरूत्साहन वा बेचबिखनको आशंका देखिएको उहाँको भनाई छ ।
कोईरालाका अनुसार हिजो बिहिबारसम्म धादिङको घाटबेशी र गल्छीको लोकेशनमा यी हराईरहेका छात्राहरूले प्रयोग गरेको मोवाइल नम्बर ट्रयाकिङ भएको छ ।अझै पनि नेपाल भित्रै भेटिन्छ कि भन्ने बिश्वास रहेकाले यी छात्राहरूको खोजि र उद्दारमा परिवार र प्रहरीलाई सहयोग गरिदिन वि.व्य.सका अध्यक्ष कोईरालाले अनुरोध गर्नुभएको छ ।
उनिहरुको खोजतलासका लागि सहयोग गरिदिन अभिभावकले आग्रह गरेका छन् ।अभिभावकले बिहीबार जिल्ला प्रहरी कार्यालय धादिङमा निवेदन दिएपछि उनीहरूको खोजी भइरहेको जिल्ला प्रहरी कार्यालय धादिङका सूचना अधिकारी एवम प्रहरी नायब उपरिक्षक मकेन्द्रकुमार मिश्रले जानकारी दिनुभयो ।
खोजीका लागी सादा पोसाकमा समेत प्रहरी परिचालन गरिएको मिश्रले बताउनुभयो ।बेपत्ता बालिकाहरु तीनै जना धादिङबेशीमा आफ्नै परिवारसँग बस्दै आएका थिए ।