धादिङ जिल्लामा निरन्तर वर्षाको पूर्वानुमानसँगै जिल्ला प्रशासन कार्यालय धादिङले आजदेखि साउन २० गतेसम्म सर्तकता अपनाउन सर्वसाधारणलाई आग्रह गरेको छ । प्रशासनले आज एक सार्वजनिक सूचना जारी गर्दै जल तथा मौसम विज्ञान विभाग अन्तर्गत बाढी पूर्वानुमान महाशाखाको पछिल्लो बुलेटिनलाई उद्धृत गर्दै यो सर्तकता जारी गरेको हो ।
बुलेटिनअनुसार २० गतेसम्म त्रिशुली र बुढीगण्डकी नदीमा पानीको बहाव उल्लेखनीय रूपमा बढ्ने पूर्वानुमान गरिएको छ । त्यस्तै, आजैदेखि धादिङ तथा आसपासका जिल्लाबाट बहने स–साना नदीहरूको बहाव समेत उल्लेख्य रूपमा बढ्ने देखिएको र आकस्मिक बाढीको मध्यम जोखिम रहने सम्भावना पनि महाशाखाले औंल्याएको छ ।
आउँदो साउन १९ र २० गते बागमती प्रदेश अन्तर्गतका केही स–साना नदीहरूमा आकस्मिक रूपमा पानीको बहाव बढ्न सक्ने भएकाले सतर्क रहन र आवश्यक सावधानी अपनाउन प्रशासनले विशेष अनुरोध गरेको छ । साथै, नागरिकलाई खोला, नदी किनार तथा जोखिमयुक्त क्षेत्रहरूमा नजान र सम्भावित जोखिमबाट जोगिन पूर्वतयारी अपनाउन समेत प्रशासनले आग्रह गरेको छ ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |